Թալիբները հայտարարել են Աֆղանստանի վրա լիակատար վերահսկողություն սահմանելու մասին. ըստ դիմադրության ուժերի՝ մարտերը շարունակվում են

«Թալիբան» արմատական շարժման ներկայացուցիչները հայտարարել են Աֆղանստանի ողջ տարածքի, այդ թվում՝ Փանջշիր նահանգի վրա լիակատար վերահսկողություն սահմանելու մասին: Այս մասին հայտնում է Reuters-ը՝ վկայակոչելով կազմակերպության աղբյուրները:

Միևնույն ժամանակ, Shamshad News հեռուստաալիքը հաղորդել է, որ Փանջշիրի ազգային դիմադրության ուժերը հերքել են թալիբների տարածած տեղեկատվությունը, թե նրանց հաջողվել է ամբողջությամբ գրավել իրենց ենթակայության տակ գտնվող շրջանը:

Նույն օրը` ավելի վաղ, թուրքական Yeni Şafak պարբերականը հայտնել էր, որ Փանջշիր նահանգի վերահսկողությունն անցել է Աֆղանստանի նոր իշխանություններին: 

Նախօրեին Քաբուլի իշխանությունների ներկայացուցիչների և դիմադրության ուժերի միջև բանակցությունները ձախողվել էին թալիբ զինյալների դիրքորոշման պատճառով: