ԱՄՆ-ն ուսումնասիրում է Ադրբեջանին օգնության հնարավոր դադարեցման հարցը. Բլինքեն

ԱՄՆ-ը կշարունակի դիտարկել Ադրբեջանին տարբեր տեսակի, այդ թվում՝ ռազմական օգնության հետագա տրամադրման նպատակահարմարությունը՝ Լեռնային Ղարաբաղի շուրջ հակամարտության գոտում շարունակվող լարվածության ֆոնին: Այս մասին, ըստ ՏԱՍՍ-ի, երեքշաբթի հայտարարել է ԱՄՆ պետքարտուղար Էնթոնի Բլինքենը։

ԱՄՆ արտաքին գործերի նախարարության ղեկավարի մասնակցությամբ լսումների ժամանակ բարձրացվել է Բաքվին Վաշինգտոնի օգնության հարցը: Լսումներն անցկացվել են ԱՄՆ Սենատի արտաքին հարաբերությունների հանձնաժողովում, որի նախագահ Ռոբերտ Մենենդեսը (դեմոկրատ, Նյու Ջերսի նահանգից, հայամետ գործիչ) հայտարարել է, որ ինքը հիասթափված է ԱՄՆ վարչակազմի որոշումից՝ շարունակել օժանդակություն տրամադրել Ադրբեջանի կառավարությանը, այդ թվում՝ ռազմական: ԱՄՆ կառավարության գործադիր իշխանությունը մայիսին հրապարակավ հայտարարել էր այս որոշման մշակման մասին:

«Մենք ստիպված կլինենք շարունակել դա դիտարկել,- ասել է Բլինքենը՝  պատասխանելով Մենենդեսին:- Ես ակտիվորեն աշխատել եմ այս ուղղությամբ: Հատկապես՝ գերիների վերադարձի շուրջ բանակցություններում փոխգործակցության իսկական կարգավորման նպատակով»։