Թուրքիան Եգիպտոսի հետ սկսում է շփումները դիվանագիտական մակարդակով. Չավուշօղլու

2013-ին խզված թուրք-եգիպտական հարաբերությունների վերականգնումը որոշ ժամանակ կտևի, բայց ո՛չ Անկարան, ո՛չ էլ Կահիրեն որևէ նախապայման չեն առաջադրել այս հարցի վերաբերյալ․ «Անադոլու» գործակալությանը և TRT հեռուստաալիքին տված հարցազրույցում ասել է Թուրքիայի արտգործնախարար Մևլյութ Չավուշօղլուն:

«Անկարան հետախուզական և արտաքին հարաբերությունների ոլորտում կապեր է պահպանում Եգիպտոսի հետ: Մենք կապեր ենք հաստատել դիվանագիտական մակարդակով»,- ասել է նա:

Թուրքական դիվանագիտության ղեկավարը շեշտել է, որ ո՛չ Եգիպտոսը, ո՛չ էլ Թուրքիան մինչ օրս որևէ նախապայման չեն առաջադրել հարաբերությունների կարգավորման համար:

«Այնուամենայնիվ, կապերը խզվել էին շատ տարիներ առաջ, հետևաբար, անհնար է կարգավորել հարաբերությունները մեկ գիշերվա ընթացքում, այնպես, կարծես ոչինչ չի պատահել: Դա անելու համար հարկավոր է անընդմեջ հանդիպումներ անցկացնել, սահմանել ճանապարհային քարտեզ և գործել այդ հիմքի վրա: Իհարկե, այսքան տարի անց կա նաև վստահության որոշակի խնդիր: Դա նորմալ է երկու կողմերի համար էլ»,- ասել է նախարարը:

Չավուշօղլուն նշել է, որ նախկինում բազմիցս հանդիպել է Եգիպտոսի արտաքին գործերի նախարար Սամեհ Շուքրիի հետ տարբեր միջազգային հարթակներում: