ԱՄՆ-ը Ռուսաստանի դեմ նոր պատժամիջոցներ է նախապատրաստում. ամերիկյան ԶԼՄ–ներ

ԱՄՆ նախագահ Ջո Բայդենի նոր վարչակազմը պատժամիջոցներ և մի շարք այլ լուրջ միջոցներ է նախապատրաստում Ռուսաստանի դեմ՝ կապված ամերիկյան իշխանությունների և ընկերությունների համակարգչային ցանցերի վրա լայնածավալ ենթադրյալ կիբերհարձակման, ինչպես նաև Ալեքսեյ Նավալնիի շուրջ ստեղծված իրավիճակի հետ: Այս մասին երեքշաբթի հաղորդել է The Washington Post-ը՝ վկայակոչելով իր աղբյուրները. հայտնում է ՏԱՍՍ-ը:

Հրապարակման համաձայն՝ այդ միջոցառումների նպատակը կլինի «ավելի լայն ազդանշան ուղարկելը», քանի որ Ռուսաստանի իշխանությունները, իբր, «երկար տարիներ կիբերտարածքում միջոցներ են կիրառել՝ մի շարք գործողություններ իրականացնելու համար, որոնք թշնամական են ԱՄՆ-ի և դաշնակիցների շահերի համար»: Բացի այդ, ըստ The Washington Post-ի, ԱՄՆ-ը միջոցներ կձեռնարկի, «ուղղված Մոսկվային պատասխանատվության ենթարկելուն», այնպիսի գործողությունների համար, ինչպիսիք են «Նավալնիի նկատմամբ արգելված քիմիական զենք կիրառելը»:

Սպիտակ տունը և պետդեպարտամենտը դեռ չեն արձագանքել ՏԱՍՍ-ի թղթակցի խնդրանքին՝ հաստատել հրապարակման տեղեկատվությունը: