ԱՄՆ-ը պատժամիջոցներ է նախապատրաստում ռուսական բանկերի դեմ

ԱՄՆ նախագահ Ջո Բայդենի վարչակազմը նախապատրաստել է Ռուսաստանի դեմ պատժամիջոցների նախնական փաթեթը, ներառյալ՝ արգելք, որ ամերիկյան բանկերը  ռուսական խոշոր բանկերի հետ գործարքներ իրականացնեն։ Դրանց թվում կարող են լինել «ՎՏԲ բանկը», «Սբերբանկը», ՎԷԲ-ը և «Գազպրոմբանկը». հայտնում է Reuters-ը՝ վկայակոչելով գործին ծանոթ երեք անձանց։

Ըստ աղբյուրների՝ սահմանափակումները նախատեսված են Ուկրաինայի տարածք Ռուսաստանի «ներխուժման» դեպքում։ Գործակալության զրուցակիցները նշել են, որ այդ միջոցները կոչված են վնասելու ռուսական տնտեսությանը` խզելով բանկերի «թղթակցային» հարաբերությունները, որոնք կազմում են համաշխարհային դրամական հոսքերի հիմքը։

Վաշինգտոնը մտադիր է նաև պատժամիջոցներ կիրառել ռուսաստանյան որոշ անհատների և ընկերությունների նկատմամբ՝ նրանց սև ցուցակում ներառելով, ինչը նրանց կբացառի ԱՄՆ բանկային համակարգից, կարգելվի ամերիկացիների հետ առևտուրը, կսառեցվեն նրանց ակտիվները ԱՄՆ-ում։