ԱՄՆ-ը որոշել է զորքերը դուրս չբերել Գերմանիայից

ԱՄՆ նախագահ Ջո Բայդենի վարչակազմը կասեցրել է ամերիկացի զինվորականների զգալի մասին Գերմանիայից հետ կանչելու որոշումը: Պետության նախկին ղեկավար Դոնալդ Թրամփն ավելի վաղ հավանություն էր տվել Գերմանիայից 9,5 հազար զինվորականի դուրսբերմանը: ԱՄՆ պաշտպանության նախարար Լլոյդ Օսթինն այժմ վերլուծում է նախկին նախագահի որոշումը․ ըստ «Կոմերսանտ»-ի՝ հայտնել է երկրի զինված ուժերի եվրոպական հրամանատարության ղեկավար Թոդ Ուոլթերսը:

«Վերջում պաշտպանության նախարար Լլոյդ Օսթինը որոշում կկայացնի ԱՄՆ նախագահի հետ»,- լրագրողներին ասել է Ուոլթերսը:

Նրա խոսքով՝ Օսթինը զորքերի դուրսբերման մասին որոշման «շատ մանրակրկիտ վերանայման փուլում է», որոշումն այժմ «սառեցված է»:

Դոնալդ Թրամփը խոստացել էր կրճատել Գերմանիայում ռազմական անձնակազմի թիվը 34,5 հազարից 25 հազարի՝ ՆԱՏՕ-ին Գերմանիայի վճարումների ուշացման պատճառով: ԱՄՆ նախագահի ազգային անվտանգության հարցերով խորհրդական Ռոբերտ Օ'Բրայանն ասել է, որ ԱՄՆ-ը կարող է փոխել դուրսբերման պլանները, եթե Գերմանիան կատարի երեք պայման՝ դադարեցնի «Հյուսիսային հոսք-2»-ի շինարարությունը, որպես 5G ծառայություն մատուցող՝ չընտրի չինական Huawei-ը և արագացնի իր  պաշտպանունակությունն ամրապնդելու ծրագրի կատարումը: