Հուշագրի տեքստի հրապարակման հարցը «Ազատ հայրենիքը» պետք է որոշի. Սամվել Բաբայան

Մենք դեմ չենք հուշագրի տեքստը հրապարակելուն, «Ազատ հայրենիքից» պետք է հարցնեք, նրանց հետ բանակցեք, ես նման խնդիր չունեմ հրապարակելու կամ չհրապարակելու հետ կապված: Այս մասին սեպտեմբերի 9-ին ԱՀ ԱԺ-ում կայացած հանդիպման ժամանակ նշել է Արցախի Անվտանգության խորհրդի քարտուղար Սամվել Բաբայանը՝ մեկնաբանելով «Ազատ հայրենիք-ՔՄԴ» կուսակցությունների դաշինքի և իր գլխավորած  «Միասնական հայրենիք» կուսակցության միջև ստորագրված հուշագրի կետերը հրապարակելու մասին հարցը:

Նրա խոսքով՝ արտառոց ոչինչ տեքստում չկա, բայց հրապարակման հետ կապված հարցը «Ազատ հայրենիքը» պետք է որոշի: Նա նաև ավելացրել է, որ ՀՅԴ Արցախ ԿԿ ներկայացուցիչ Դավիթ Իշխանյանին հայտնի է հուշագրի տեքստի բովանդակությունը:

Անդրադառնալով երկու քաղաքական ուժերի համագործակցությանը, Սամվել Բաբայանը նշել է, որ հուշագիրը ստորագրվել է, որպեսզի կարողանան միասին ճանապարհ ընթանալ, իրար լսել, հարգել, աշխատավարձ բարձրացնել, տնտեսական հարցեր լուծել, տնտեսական զարգացման ճանապարհ ընտրել: Հակառակ դեպքում «առանց դուռ շրխկացնելու հեռանալու են»:

«Հուշագրում ստորագրված սկզբունքներից մի ստորակետ անգամ չեմ զիջելու և ես դա հենց առաջին բանակցությունների ժամանակ ասել եմ: Մնացած բոլոր հարցերում նախագահը ընտրված է, իրենք մեծամասնություն են պառլամենտում, մենք չենք կարող իրենց ստիպել»,- ասել է ԱԱԽ քարտուղարը:

Սամվել Բաբայանի ելույթից հետո ԱՀ ԱԺ նախագահ Արթուր Թովմասյանը ասել է, որ հուշագիրը երկու կուսակցությունների պատվի հարցն է, ավելացնելով, որ «Ազատ հայրենիք-ՔՄԴ» դաշինքը և «Միասնական հայրենիք» խմբակցությունը միասին պատասխանատվություն են կրելու կառավարության գործունեության մասով»: