Թուրքիան Արևելյան Միջերկրական ծովում մարտական կրակով զորավարժություններ կանցկացնի

Թուրքիայի պաշտպանության նախարարությունը հայտնել է, որ սեպտեմբերի 1-2-ը նրանք Միջերկրական ծովի արևելյան մասում իրականացնելու են ռազմածովային զորավարժություններ՝ մարտական կրակի ուղեկցությամբ:

Արևելյան Միջերկրածովյան տարածաշրջանի վերահսկողությունը վիճարկվում է ինչպես Թուրքիայի, այնպես էլ Հունաստանի կողմից: Երկու երկրներն էլ ՆԱՏՕ-ի անդամ են: Իրավիճակը սրվել է այն բանից հետո, երբ Անկարան այս ամիս սեյսմիկ-հետախուզական նավ է ուղարկել վիճելի տարածաշրջան: Հունաստանն այդ քայլը համարեց սադրանք: Հինգշաբթի թուրքական նավատորմը տեղեկատվական ծանուցագիր թողարկեց (հայտնի էր որպես Navtex), որը վերաբերում էր Կիպրոսի հյուսիս-արևելք՝ Իսքենդերունի ափին իրականացվելիք վարժանքներին:

Հիշեցնենք, որ օգոստոսի 26-ից 28-ը Իտալիայում, Հունաստանում և Կիպրոսում զորավարժություններ են անցկացվում, որոնց միացել է Ֆրանսիան: Ինչպես ավելի վաղ հայտնել էր Sputnik-ը, Ֆրանսիայի նախագահ Էմանուել Մակրոնը հայտարարել է, որ կողմ է ճկուն մոտեցմանը Թուրքիայի հետ հարաբերությունների խնդիրների լուծման հարցում: