Թուրքիան պատասխանել է Մակրոնի պատժամիջոցների սպառնալիքներին. «Արդյունք չի տալու»

Պատժամիջոցներով Թուրքիային սպառնալն անընդունելի է: Նախագահ Մակրոնի հայտարարությունները մեր երկրի համար նշանակություն չունեն. հայտարարել է Թուրքիայի արտգործնախարարության խոսնակ Համի Աքսոյը՝ մեկնաբանելով Ֆրանսիայի նախագահ Էմանուել Մակրոնի համապատասխան հայտարարությունները:

Աքսոյը շեշտել է, որ այդ սպառնալիքները «արդյունք չեն բերի». հայտնում է Anadolu գործակալությունը:

Թուրքիայի արտգործնախարարության ներկայացուցչի մեկնաբանությունը կատարվել է այն բանից հետո, երբ Էմանուել Մակրոնը ԵՄ-ից պահանջել է պատժամիջոցներ կիրառել Թուրքիայի դեմ՝ նշելով, որ Անկարան խախտել է Հունաստանի և Կիպրոսի տարածքային ջրերը: Ֆրանսիայի նախագահը նաև Բրյուսելին կոչ է արել ձեռնարկել քայլեր՝ կապված Լիբիայի ճգնաժամի հետ:

 «Ֆրանսիան պետք է զսպված և ռացիոնալ քաղաքականություն վարի», - ասել է թուրք պաշտոնյան՝ Փարիզին կոչ անելով «դադարեցնել աջակցել Լիբիայի ապստամբներին, Սիրիայում ահաբեկիչներին և նրանց, ովքեր գործում են «Ես այս վայրի միակ տերն եմ» սկզբունքով՝ Արևելյան Միջերկրական ծովում»: