էրդողանը դատի է տվել Le Point-ին

Թուրքիայի նախագահ Ռեջեփ Թայիփ Էրդողանը Անկարայի հանրապետական գլխավոր դատախազություն բողոքի դիմում է ուղարկել ֆրանսիական Le Point ամսագրի, լրագրող Էթիեն Ժերնելի և միջազգային բաժնի խմբագիր Ռոման Գյուբերի դեմ: Ըստ Էրդողանի՝ հոկտեմբերի 24-ին ամսագրի գլխավոր շապիկի նկարը վիրավորանք է Թուրքիայի նախագահի նկատմամբ. հաղորդում է «Անադոլու» գործակալությունը:

Թուրքիայում նախատեսվում է քրեական պատասխանատվություն երկրի նախագահին վիրավորելու համար: Էրդողանի փաստաբան Հուսեյն Այդընը 11 էջանոց դիմում է ուղարկել դատախազություն: Նա նշել է, որ ֆրանսիացիների թույլ տված արտահայտությունները չի կարելի արդարացնել խոսքի և մտքի ազատության տեսանկյունից: Ըստ փաստաբանի՝ նրանք վիրավորել են նախագահի պատիվն ու արժանապատվությունը: 

Le Point-ի գլխավոր շապիկի վրա պատկերված է Էրդողանը՝ զինվորական ողջույն անելիս, նկարի վրա  ֆրանսերեն գրված է L'éradicateur՝ արմատախիլ անող: Սա կապված է այն բանի հետ, որի հոկտեմբերի 9-ին Էրդողանի սկսած «Խաղաղության ակունք» ռազմական գործողությունից հետո քրդերը հարկադրաբար լքել են իրենց բնակավայրերը: