Թուրքիայի կառավարությունը հայտնել է, թե երբ կկազմվի Պոլսո Հայոց պատրիարքի ընտրության վերաբերյալ կանոնագիրը

Թուրքիայի ներքին գործերի նախարար Սուլեյման Սոյլուն նշել է, որ մեկ շաբաթվա ընթացքում Պոլսո Հայոց պատրիարքի ընտրությունների վերաբերյալ կանոնագիրը պատրաստ կլինի:

Օգոստոսի 30-ին Անկարայում նշվող Հաղթանակի օրվա կապակցությամբ նախագահական նստավայրում Էրդողանի կողմից կազմակերպված ընդունելությանը մասնակցել են նաև Պոլսո պատրիարքի տեղապահ՝ եպիսկոպոս Սահակ Մաշալյանը և Սբ Փրկիչ հիվանդանոցի ֆոնդի նախագահ Պետրոս Շիրինօղլուն. հաղորդում «Ակօս»-ը:

Ընդունելության ժամանակ Մաշալյանն ու Շիրինօղլուն կարճ զրույց են ունեցել երկրի նախագահ Էրդողանի հետ: Մաշալյանը «Ակօս»-ի հետ զրույցում նշել է, որ Էրդողանը հարցրել է, թե «ինչպես է ընթանում ընտրական գործընթացը», ինչին հայ համայնքի երկու ներկայացուցիչները պատասխանել են՝ սպասում են կառավարության կանոնագրին: Էրդողանը ՆԳՆ ղեկավարին հանձնարարել է, որ մեկ շաբաթվա ընթացքում պատրաստի կանոնագիրը և ուղարկի Հայոց պատրիարքարան: