Սիրիայի հյուսիսում թուրքական ռազմական գործողությունները նոր փուլ են թևակոխելու. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ «Եփրատի վահան» և «Ձիթենու ճյուղ» անունները կրող ռազմական գործողություններով սկսված գործընթացը շատ շուտով նոր փուլ է թևակոխելու: Տեղեկացնում է «Անադոլու» գործակալությունը:

«Հարկ եղած դեպքում բանակցելով, հարկ եղած դեպքում փափուկ ուժի կիրառմամբ մենք պաշտպանելու ենք մեր ազգային շահերը»,- ընդգծել է Էրդողանը:

Սիրիայի հյուսիսային շրջանները «Իսլամական պետություն» խմբավորման զինյալներից մաքրելու պատրվակով Թուրքիան 2016-2017 թվականների ընթացքում իրականացրել է «Եփրատի վահան» անունը կրող ռազմական գործողությունները, որի շրջանակում հարվածներ է հասցրել Սիրիայի քրդերին: 2018-ին թուրքական բանակը ռազմական գործողություններ էր սկսել Աֆրինի շրջաններում, որը ստացել էր «Ձիթենու ճյուղ» անվանումը: