Ինչո՞ւ եք միջամտում տեղապահի ընտրություններին. Փայլանը հարցում է ուղարկել Թուրքիայի ՆԳՆ

Թուրքիայի Ազգային մեծ ժողովի Ժողովուրդների դեմոկրատական կուսակցության` Դիարբեքիրից պատգամավոր Կարո Փայլանն իր դժգոհությունն է հայտնել Պոլսո Հայոց պատրիարք Մեսրոպ արք. Մութաֆյանի մահվանից հետո սկսված` պատրիարքի տեղապահի` հունիսի 27-ին նախատեսված ընտրությունները հետաձգելու որոշման վերաբերյալ:

Նա հարցում է ուղարկել Թուրքիայի ներքին գործերի նախարար Սուլեյման Սոյլուին` բացատրություն պահանջելով, թե ի՞նչ հիմնավորմամբ են հետաձգել ընտրությունները:

«Սակայն ձեր նախարարությունը, Ստամբուլի նահանգապետարանի միջնորդությամբ, 2019 թ. հունիսի 26-ին Պոլսո հայոց պատրիարքարան է ուղարկել մի գրություն, որում նշվում էր ընտրությունները 2019 թ. հուլիսի 4-ին հետաձգելու անհրաժեշտությունը, և այդ հետաձգման վերաբերյալ ոչ մի հայտարարություն չի եղել»,- նշել է Փայլանը:

Պատգամավորի հարցման մեջ տեղ էին գտել հետևյալ հարցապնդումները`

• Ո՞րն է Պոլսո Հայոց պատրիարքի տեղապահի` Հոգևոր խորհրդի կողմից նշանակված ընտրություններին ձեր միջամտելու հիմնավորումը:
• Որպես հիշեցում` 2017 թ. փետրվարի 16-ին տեղի են ունեցել տեղապահի ընտրություններ, սակայն նահանգապետարանի ուղարկած գրության պատճառով այդ արդյունքները չեղյալ են հայտարարվել: Հոգևոր կառույց հանդիսացող Հայոց պատրիարքարանի գործերին ինչո՞ւ և ո՞ր օրենսդրական հիմքով եք միջամտում:
• Սահմանադրական դատարանը 2019 թ. մայիսի 23-ին հայտարարել էր, որ տարիներ շարունակ պատրիարքական ընտրություններին միջամտելը կրոնական ազատությունների խախտում է: ՍԴ որոշումից հետո այս միջամտությունն արդյո՞ք խախտման շարունակությունը չէ:
• Ձեր նախարարությունը Հայոց պատրիարքարանի և պատրիարքի ընտրության օրինական հիմք հանդիսացող` 1863 թ. Հայ ազգային կանոնադրության ո՞ր հոդվածների հիման վրա է միջամտում պատրիարքի ընտրությանը: