Երկօրյա գիտաժողով՝ նվիրված Լեւոն Շանթին

Հովհաննես Թումանյանի, Կոմիտասի 150 ամյակներին զուգահեռ այս տարի նշում ենք նաեւ Լեւոն Շանթի եւ Երվանդ Օտյանի 150 ամյակները:

Երեկվանից Մանուկ Աբեղյանի անվան գրականության ինստիտուտում Լեւոն Շանթին նվիրված գիտաժողով է մեկնարկել: 

Գրականագետները նշում են, որ Շանթն իր թողած ժառանգությամբ, գրական արժեքով չի զիջում ոչ Թումանյանին, ոչ Կոմիտասին, պարզապես հանգամանքների բերումով ավելի քիչ է ուսումնասիրվել, նրա անունը հազվադեպ է շրջանառվել:

Շանթի ստեղծագործությունները լայն ընդգրկում ունեն, հենց ժանրային եւ թեմատիկ լայն ընդգրկմամբ էլ նա եզակի երեւույթ է հայ գրականության մեջ: Նա գրել է չափածո, արձակ, պիեսներ, գիտական գործեր, ծավալել է մանկավարժական գործունեություն: Ստեղծագործական այս բազմազանությունն էլ Գրականության ինստիտուտն ամբողջացրել է Շանթի ակադեմիական երկերի 9 հատորյակում:

Գրականագետների խոսքով, Շանթի ստեղծագործությունը հայ գրականության անմահ էջերից է եւ ուսումնասիրության մեծ նյութ ունի ընթերցողների եւ հետազոտողների համար: Գիտաժողովը կշարունակվի նաեւ վաղը: