Եթե նույնիսկ Քոչարյանն Արցախում իշխանության գա, Հայաստանն ու Արցախը պետք է աշխատեն որպես մեկ բռունցք. ԼՀԿ-ական պատգամավոր

Վերջին շրջանում փոխադարձ անհարգալից վերաբերմունքի դեպքեր գրանցվեցին, որոնք սխալ են. այսօր լրագրողների հետ զրույցում ասաց «Լուսավոր Հայաստան» խմբակցության քարտուղար Գևորգ Գորգիսյանը` հստակեցնելով, որ անթույլատրելի է համարում Հայաստանի և Արցախի հակադրումը:

Նա նաև ընդգծեց, որ պետք է պահպանել քաղաքական խաղի ճիշտ կանոնները, միմյանց նկատմամբ հարգանքի բարձր մակարդակ ապահովել: «Որովհետև մենք ունենք մեկ նպատակ, և այդ նպատակին հասնելու քաղաքականության մեջ անձնական հարցերը չեն կարող դեր խաղալ»,- շեշտեց ԼՀԿ խմբակցության քարտուղարը:

Դառնալով վարչապետ Նիկոլ Փաշինյանի այն գրառմանը, որ եթե Արցախը փորձեն դարձնել հակահեղափոխության օջախ, Արցախի ժողովուրդն այն կդարձնի հեղափոխության օջախ, Գորգիսյանը նշեց, որ Հայաստանն ու Արցախը չպետք է հակադրվեն միմյանց` անկախ նրանից, թե որտեղ ով կլինի իշխանության: «Նույնիսկ եթե, ամենավատ սցենարով, Ռոբերտ Քոչարյանն Արցախում գա իշխանության, միևնույն է` Հայաստանն ու Արցախը՝ որպես մեկ բռունցք, պետք է աշխատեն՝ ծառայելով Հայաստանի և Արցախի քաղաքացիների շահերին»,- ասաց պատգամավորը: