Մեծ Բրիտանիայի վարչապետի կառավարությունը հայտնվել է սահմանադրական քաոսում

Մեծ Բրիտանիայի վարչապետ Թերեզա Մեյի կառավարությունը հայտնվել է սահմանադրական քաոսում.  խորհրդարանն արգելափակել է Մեծ Բրիտանիայի՝ Եվրամիության կազմից պաշտոնապես դուրս գալու`Brexit-ի հարցով երրորդ քվեարկությունը: Այս մասին տեղեկացնում է Тhe Guardian-ը:

Համայնքների պալատի խոսնակ Ջոն Բերքոուն վարչապետին թույլ չի տվել կողմ քվեարկելու կոչով դիմել պատգամավորներին: Պատգամավորները պահանջում են հիմնովին փոխել Բրյուսելի հետ կնքվելիք համաձայնագիրը: «Այնքան ժամանակ թույլ չեմ տա Brexit-ի հարցով քվեարկություն անցկացնել, քանի դեռ ԵՄ-ն չի համաձայնել փոփոխել փաստաթուղթը»,- նշել է Ջոն Բերքոուն:

Այս անակնկալ քայլը նշանակում է, որ վարչապետը դարձյալ պետք է մեկնի Բրյուսել ու բանակցի եվրոպացի գործընկերների հետ:

Լոնդոնին 10 օր է մնացել Եվրամիությունը լքելու համար, բայց  համապատասխան փաստաթուղթն առ այսօր կնքված չէ: Միևնույն ժամանակ` ԵՄ պաշտոնյաները չեն բացառում ճգնաժամից խուսափելու նպատակով Brexit-ի համար նոր վերջնաժամկետի սահմանումը: