Շահագործման են հանձնվել «Հարավային Փարս»-ի չորս նոր բլոկներ

Իրանի Բուշեհր նահանգում երեկ շահագործման են հանձնվել «Հարավային Փարս» գազի հանքավայրի չորս նոր բլոկները. տեղեկացնում է ԻՌՆԱ-ն:

Նոր բլոկներում արդյունահանվելու է շուրջ 2 մլրդ խորանարդ մետր գազ, որի վերամշակման արդյունքում կարտահանվի օրական 113 միլիոն խորանարդ մետր հարստացված գազ, 100 միլիոն խորանարդ մետր մեթան գազ, 150 հազար բարել գազախտուցք եւ 800 տոննա ծծումբ: Տարեկան նախատեսվում է արդյունահանել նաեւ 2 մլն 100 հազար տոննա հեղուկ գազ եւ 2 մլն տոննա էթան` որպես նավթաքիմիական արդյունաբերության հիմնական հումք:

Բլոկներն ամբողջությամբ նախագծվել եւ կառուցվել են իրանցի մասնագետների միջոցով: Նախագծի իրագործման համար ավելի քան 11 մլրդ դոլար է ներդրվել:

Նշենք, որ 4 նոր բլոկների շահագործման շնորհիվ Իրանն առաջին անգամ «Հարավային Փարս» հանքավայրի արդյունահանման ծավալներով գերազանցելու է Քաթարին, որի հետ համատեղ է շահագործում հանքավայրը:

«Հարավային Փարս»-ը համարվում է աշխարհի խոշորագույն գազի հանքավայրը: