Լուրջ բանակցությունները տարբերվում են աղմկոտ ներկայացումներից. Զարիֆի անդրադարձը՝ Թրամփ-Ընի հանդիպմանը

Իրանի ԱԳ նախարար Մոհամմադ Ջավադ Զարիֆն անդրադարձել է նախօրեին Վիետնամի մայրաքաղաք Հանոյում ԱՄՆ նախագահի եւ Հյուսիսային Կորեայի առաջնորդի միջեւ կայացած ապարդյուն հանդիպմանը. հաղորդում է ԻՌՆԱ-ն:

«Թրամփը պետք է արդեն գիտակցի, որ աղմկոտ ներկայացումները, լուսանկարվելն ու դիրքորոշումների անակնկալ փոփոխությունը կտրուկ տարբերվում են լուրջ դիվանագիտութիւնից»,- Twitter-ի իր միկրոբլոգում գրել է Իրանի արտաքին քաղաքական գերատեսչության ղեկավարը՝ հավելելով. «10 տարի տեւած ուժերի չափում, 2 տարի/բառի ամենաբուն իմաստով՝ հազարավոր ժամեր/ բանակցեցինք Միջուկային համապարփակ համաձայնագրի` 150 էջանոց փաստաթղթի յուրաքանչյուր բառի համար: Դուք երբեւէ դրանից ավելի լավ համաձայնության չեք հասնի»:

Հիշեցնենք, որ փետրվարի 28-ին Հանոյում Հս. Կորեայի ապամիջուկայնացման մասին Դոնալդ Թրամփի եւ Կիմ Չեն Ընի միջեւ բանակցություններն ավարտվել  են առանց որեւէ համաձայնության կայացման, ինչն էլ լուրջ ձախողում է համարվում ԱՄՆ նախագահի համար: