Ստեփանակերտի Պատկերասրահում բացվել է ժամանակակից քանդակների ցուցահանդես

Ինչպես տեղեկացնոմ է aparaj.am-ը, նոյեմբերի 16-ին Ստեփանակերտի Պատկերասրահում բացվել է ժամանակակից քանդակների ցուցահանդես: Ցուցահանդեսում ներկայացված են երիտասարդ քանդակագործների պատկերացումները ազատության, հաղթանակի, անցյալի ու ապագայի մասին:

Միջոցառումն իրականացվել է ԱՐՏ PR ընկերության նախաձեռնությամբ, որի հիմնադիր-տնօրեն Գայանե Դավթյանի խոսքով արվեստի մյուս ճյուղերի հետ համեմատ այսօր քանդակագործությունը կարծես ստվերում է հայտնվել և այսպիսի ցուցահանդեսները նպատակ ունեն «երիտասարդ արվեստագետներին դուրս բերել իրենց արվեստանոցներից, որպեսզի նրանք կարողանան իրենց արվեստով խոսել տարբեր մշակութային միջավայրերում և անձամբ հաղորդակցվել տեղի արվեստասերների հետ»:

Ցուցահանդեսի բացմանը ներկա էր նաև ԱՀ մշակույթի, երիտասարդության հարցերի և զբոսաշրջության նախարար Լեռնիկ Հովհաննիսյանը, ով բարձր գնահատեց ԱՐՏ PR ընկերության հետ համագործակցությունը և նշեց, որ այն շարունակական բնույթ է կրելու: Նա հույս հայտնեց, որ քանդակագործական արվեստում այսօր կատարվող սերնդափոխությունը կընթանա հեզասահ ու անցավալի:

Հավելենք, որ ցուցահանդեսը Ստեփանակերտում կտևի մինչև նոյեմբերի 26-ը, որից հետո կցուցադրվի նաև Շուշիի Կերպարվեստի թանգարանում: