ԱՄՆ պետքարտուղարության խոսնակը հաղորդագրություն է հղել Թուրքիայում հեղաշրջման փորձի 2-րդ տարվա առիթով

ԱՄՆ պետքարտուղարության խոսնակ Հիթեր Նոյերթը Թուրքիայում ռազմական հեղաշրջման փորձի երկրորդ տարվա առիթով հաղորդագրություն է հղել:

Ըստ Demokrathaber-ի` ամերիկացի պաշտոնյան կրկին ցավակցել է  այդ ժամանակ զոհված 250 հոգու ընտանիքներին և նշել, որ ձախողված հեղաշրջումը հարված է ժողովրդավարությանը:

«Ժողովրդավարության պահպանման համար հարկավոր է ջանք և հիմնական ազատությունների պահպանում»,- նշել է Նոյերթը:

Նշենք, որ երեկ` հուլիսի 15-ին, լրացավ Թուրքիայում ռազմական հեղաշրջման փորձի երկրորդ տարելիցը: Թուրքիայի իշխանությունները մինչ օրս դրա կազմակերպման մեջ մեղադրում են իսլամի քարոզիչ, ամերիկաբնակ Ֆեթուլլահ Գյուլենին և պահանջում նրա արտահանձնումը:

Ուշագրավ է, որ Նոյերթը բազմիցս հայտնվել է թուրքական ԶԼՄ-ների ուշադրության կենտրոնում: Նա հաճախ իր հայտարարություններով քննադատել է Թուրքիայի իշխանություններին` հեղաշրջման փորձից հետո հայտարարված արտակարգ դրությունը  մի քանի անգամ անհիմն երկարաձգելու համար: