Էրդողանին վիրավորելու համար ևս մեկ պատգամավոր կարող է զրկվել մանդատից

Թուրքիայի քրդամետ Ժողովուրդների դեմոկրատական կուսակցության խորհրդարանական խմբակցության  ղեկավարի պաշտոնակատար և Մուշի պատգամավոր Ահմեթ Յըլդըրըմը  կարող է զրկվել պատգամավորական մանդատից:

Ըստ Demokrathaber-ի՝ պատճառը նույնն է՝ Թուրքիայի նախագահ Ռեջեփ Թայիփ Էրդողանին վիրավորելը: Նա Էրդողանին անվանել էր  «պալատի թափթփուկ փադիշահ»: Այդ արտահայտության համար Մուշի  դատարանը նրան դատապարտել էր 1 տարվա ազատազրկման, սակայն պատիժը հետաձգվել էր: Պատգամավորին հնարավորություն էր տրվել գումարի դիմաց խուսափել ազատազրկումից:

Ավելի վաղ պատգամավորական մանդատից զրկվել էին քրդամետ կուսակցության նախկին համանախագահներ Ֆիգեն Յուքսեքդաղը և Սելահաթթին Դեմիրթաշը, ովքեր այժմ բանտում են: