Հանրային խորհրդի մասին օրենքն առաջին ընթերցմամբ ընդունվեց. ընդդիմությունը դեմ էր

ԱԺ-ն առաջին ընթերցմամբ ընդունեց «Հանրային խորհրդի մասին» օրենքի նախագիծը: Ըստ նախագծի` Հանրային խորհուրդը կազմված է լինելու 45 անդամից, կից գործելու են 15 ոլորտային մշտական հանձնաժողովներ: Երեկ ընդդիմադիրները դժգոհություն էին հայտնել խորհրդի գործունեության վերաբերյալ:

Վարման կարգով ելույթում «Ծառուկյան» խմբակցության քարտուղար Վահե Էնֆիաջյանն ասաց, որ տևական ժամանակ այդ մարմինը որևէ դրական իմպուլս հասարակությանը չի հաղորդել, ուստի իրենք դեմ կքվեարկեն նախագծին:

Վարման կարգով ելույթ ունեցավ նաև «Ելք» խմբակցության պատգամավոր Նիկոլ Փաշինյանը և ասաց. «Փաստորեն, նոր էլ ՀՀԿ խմբակցությունը չհերքեց, ու ես ուզում եմ մեկ արձանագրություն անել` եթե Սերժ Սարգսյանը, ի հեճուկս իր խոստման, որոշի առաջադրվել վարչապետի թեկնածու, դա կարող է կտրուկ սրել ՀՀ-ում ներքաղաքական իրավիճակը»: