«Ա´յ Էրդողանի մինյոններ». պոլսահայ լրագրողը չի զսպել վրդովմունքը Հայոց պատրիարքարանի հայտարարության կապակցությամբ

Պոլսահայ լրագրող Արիս Նալջըն ֆեյսբուքյան էջում իր վրդովմունքն է հայտնել Պոլսի հայոց պատրիարքարանի հայտարարության կապակցությամբ, որում նշվում է, թե աջակցում են Սիրիայի Աֆրին քաղաքում թուրքական ԶՈւ-ի սկսած գործողություններին:

 «Շատ հետաքրքիր է՝ Թուրքիայի հայոց պատրիարքարանն իր ո՞ր աղոթքով կամ հայերեն Աստվածաշնչի ո՞ր հատվածով և ինչպե՞ս կբացատրի իր հայտարարությունը, թե «աղոթում է Թուրքիայի Հանրապետության հավերժության, ամբողջականության, ինչպես նաև ժողովրդի միասնականության ու բարեկեցության համար»: Պատրիարքարանի պաշտոնյաները կամ հոգևորականներն Աստվածաշունչը հակառակ կողմի՞ց են կարդում, թե՞, առհասարակ, աչքերով չեն կարդում: Եթե չեն կարողանալու բացատրել իրենց հայտարարությունը, ապա թող «ոչնչացնեն» իրենք իրենց: Ա´յ հավերժության մոլագարներ, Էրդողանի մինյոններ»,- գրել է Նալջըն:

Հիշեցնենք, որ պատրիարքարանի տարածած հայտարարության մեջ մասնավորապես նշվել է. «Ինչպես միշտ, այնպես էլ հիմա շարունակելու ենք մեր եկեղեցիներում աղոթել Թուրքիայի Հանրապետության հավերժության, ամբողջականության, ինչպես նաև մեր ժողովրդի միասնականության և բարեկեցության համար»: