Պոլսահայ լրագրողը շնորհավորել է Նիշանյանին՝ բանտից փախուստի կապակցությամբ

Տեղեկացրել ենք, որ Թուրքիայում 17 տարվա ազատազրկման դատապարտված պոլսահայ գրող, մտավորական Սևան Նիշանյանը երեկ փախել է «Ֆոչա» բաց բանտից։ Նա  դուրս է եկել անվտանգության նվազագույն միջոցառումներ իրականացնող բանտից և չի վերադարձել:

Հիշեցնենք, որ իշխանության դեմ իր սուր ելույթներով հայտնի Նիշանյանին  ձերբակալել և դատապարտել էին իր սեփական պարտեզում «անօրինական» շինարարություն իրականացնելու համար: Նիշանյանը պարբերաբար քննադատում էր թուրքական իշխանություններին` բացահայտ խոսելով  Հայոց ցեղասպանության մասին:

Նիշանյանի փախուստի մասին դրական արձագանքներ են հնչում։ Փախուստին արձագանքել է նաև պոլսահայ հայտնի լրագրող Հայկո Բաղդադը։

Նա իր Twitter-յան էջում գրել է,-«Եթե Սևան Նիշանյանն իսկապես փախել է բանտից, հազար անգամ շնորհավորում եմ»։

Հիշեցնենք, որ հայազգի գրող Նիշանյանը փախուստի մասին տեղեկացրել է  իր Թվիթերի էջում՝ գրելով. «Թռչնակը թռավ. տարոսը մնացյալ 80 մլն-ին»: