«Ելք» դաշինքը երթից հետո կքննարկի նախագահի թեկնածուի հարցը. Արամ Սարգսյան

«Ելք» խմբակցության պատգամավոր Արամ Սարգսյանը, նկատի ունենալով ՀՀԿ-ի կողմից ՀՀ նախագահի պաշտոնում առաջադրված Արմեն Սարգսյանին, լրագրողներին ասաց, որ  չի կարող անհատի մասին կարծիք հայտնել: Նախքան թանկացումների դեմ երթը սկսելը նա նշեց, որ «Ելք» դաշինքը երթից հետո կքննարկի նախագահի թեկնածուի հարցը:

Հիշեցնենք, որ այսօր` ժամը 17:00-ից, «Մոսկվա» կինոթատրոնի մոտից մեկնարկելու է «Ելք» դաշինքի երթը` ընդդեմ թանկացումների:

«Չեմ համարում, որ այսօր մեր թիվ մեկ խնդիրը նախագահի թեկնածուն է: Այսօր մեզ համար թիվ մեկ խնդիրը երթն է», - ասաց պատգամավորը:

Նա նշեց, որ ինքն անձամբ ունի իր նախընտրելի թեկնածուն՝ Արտակ Զեյնալյանը, ով առաջադրվել է «Ելք» դաշինքի կողմից:

Արամ Սարգսյանը միևնույն ժամանակ չբացառեց, որ Հանրապետականը հնարավոր է դիտմամբ է իրենց երթի օրը հայտարարել նախագահի իրենց թեկնածուի անունը: «Հանրապետականը նման տեղեկատվությունը հանրությանը մատուցեց՝ փորձելով երկրորդել երթի կարևորությունը»,- կարծիք հայտնեց նա: