Lավ չլսեցիք. Բաբլոյանը` Փաշինյանին

Մեկնարկել է ԱԺ 6-րդ գումարման 3-րդ նստաշրջանը: Նիստը սկսվեց ՀՀ օրհներգով, ինչից հետո ԱԺ նախագահ Արա Բաբլոյանը տեղեկացրեց, որ, հաշվի առնելով հասարակական և քաղաքական շրջանակներում առանձին ապրանքատեսակների գնաճի հետ կապված մտահոգությունները, ինչպես նաև նախագահի առաջարկները, ԱԺ նախագահի նախաձեռնությամբ հունվարի 23-ին` ժամը 11-ին, ԱԺ նիստերի դահլիճում հրավիրվում են «Առանձին ապրանքատեսակների գների բարձրացման պատճառները և գնաճը մեղմելու հնարավորությունները» թեմայով լսումներ:

Բաբլոյանը խնդրեց տնտեսական հարցերով ԱԺ մշտական հանձնաժողովի և այլ իրավասու հանձնաժողովների` համատեղ կազմակերպել խորհրդարանական լսումների անցկացումն ապահովելու` պետական շահագրգիռ մարմինների և ՀԿ-ների մասնակցությունը:

Այնուհետև «Ելք» խմբակցության ղեկավար Նիկոլ Փաշինյանը Բաբլոյանին ճշտող հարց տվեց. «Դուք ասացիք` լսումները նախագահի հանձնարարականո՞վ է եղել: Սերժ Սարգսյանը հանձնարարակա՞ն է տվել»:

Բաբլոյանը պատասխանեց, որ Փաշինյանը սխալ է լսել, քանի որ ինքը նշել է, որ նախագահն առաջարկներ է արել: «Դուք լավ չլսեցիք: Ես ասացի, որ այդ հարցին անդրադարձել է նախագահը և առաջարկություններ է արել: Լսումներն իմ նախաձեռնությամբ են»,- ասաց նա: