Ադրբեջանը ձեռնարկում է բոլոր հնարավոր քայլերը ՄԻԵԴ-ի որոշումը կատարելու համար. Ալիևի օգնական

Եվրոպայի խորհրդի նախարարների կոմիտեն Ադրբեջանի նկատմամբ առաջին անգամ փորձում է գործարկել Մարդու իրավունքների եվրոպական կոնվենցիայի 46.4 դրույթը: Այդ մասին հայտարարել է Ադրբեջանի նախագահի արտաքին քաղաքականության հարցերով օգնական Նովրուզ Մամեդովը. հայտնում է АПА-ն:

Խոսելով REAL-ի ղեկավար Իլգար Մամեդովի ազատման մասին` նա նշել է, որ Ադրբեջանը ձեռնարկում է բոլոր հնարավոր քայլերը ՄԻԵԴ-ի որոշումը կատարելու համար. երկրում շարունակվում են  բարեփոխումները արդարադատության ոլորտում:

«Դրա հետ կապված` 2017-ի դեկտեմբերի 1-ից Իլգար Մամեդովը դատարան դիմելու հիման վրա պայմանական ազատվելու իրավունք է ստանում  իր պատժի ժամկետի 2/3-ը կրելուց հետո: Միևնույն ժամանակ, ադրբեջանական կողմը կարող է  գնալ նաև կառուցողական բանակցությունների` այդ հարցի լուծման այլ ուղիներ գտնելու համար»,- ասել է ԱԼիևի օգնականը:

Իլգար Մամեդովը ձերբակալվել էր 2013-ին Իսմայիլիում տեղի ունեցած զանգվածային անկարգությունների առնչությամբ: