Ստամբուլում փայտերով հարձակվել են Հրանտ Դինքի եղբոր գրախանութի վրա. կա վիրավոր

Կ.Պոլսի (Ստամբուլի) Բաքըրքոյ շրջանում փայտերով հարձակվել են «Ակօս» թերթի խմբագիր Հրանտ Դինքի եղբոր՝ Օրհան Դինքի գրախանութի վրա:

Ըստ Haber.Sol-ի՝ միջադեպը տեղի է ունեցել երեկ, երբ մեկը ցանկացել է իր մեքենան կայանել Դինքի եղբորը պատկանող «Սպիտակ մարդ» անունով գրախանութի դիմաց: Աշխատակիցները զգուշացրել են, որ այդ տարածքում մեքենա կայանելը թույլատրված չէ, սակայն մեքենայի վարորդը վեճի է բռնվել նրանց հետ: Վեճից կարճ ժամանակ անց երեք տարբեր խմբի բաժանված անձինք, փայտերով զինված, հարձակվել են գրախանութի վրա և փորձել ներս մտնել: Ըստ որոշ աղբյուրների՝ խմբի կազմում են եղել նաև այդ շրջանի մի շարք խանութպաններ: Երբ խանութի աշխատակիցները փորձել են ներս մտնողներին ետ պահել, նրանք փայտերով հարվածել են աշխատակիցներին, որոնցից մեկը գլխից վիրավորվել է: Նա հոսպիտալացվել է:

Դեպքի վայր ժամանած ոստիկանությունը բաժանմունք է տեղափոխել հանցավոր խմբի անդամներին և խանութի աշխատակիցներին:

Չնայած պնդումներին, թե դեպքը քաղաքական ենթատեքստ չունի, Դինք ընտանիքի բարեկամներն ու գրախանութի աշխատակիցները համոզված են, որ այդ շրջանում բոլորը գիտեն, որ գրախանութը պատկանում է Դինք ընտանիքին:  Նրանց խոսքով` փայտերով գրախանութի վրա հարձակվելու երևույթը միայն կռիվ լինել չի կարող: «Սա ավելի քան ատելություն է»,- նշել են նրանք: