Հալեպի բնակչությանը կանոնավոր էլեկտրականություն կմատակարարվի

Երեկ Հալեպի մուտքի մոտ՝ Սֆիրե արվարձանում, բացվել է էլեկտրամատակարարման նորակառույց ցանցը:

Ըստ «Գանձասար»-ի՝ բացման պաշտոնական արարողությանը ներկա են եղել Սիրիայի զբոսաշրջության նախարարը,  Հալեպի նահանգապետը, կուսակցապետեր, Սիրիայի խորհրդարանի պատգամավոր Ժիրայր Ռեիսյանը:

«Գանձասար»-ի հարցին, թե Հալեպի բնակչության էլեկտրականության մատակարարումն ի՞նչ կանոնավորությամբ է լինելու, Ռեիսյանը պատասխանել է, որ այս ցանցի շնորհիվ տոնական այս օրերին Հալեպի բնակչությունն առավելագույն չափով էլեկտրականություն կունենա, այնուհետև Սիրիայի մնացած քաղաքներին` համահավասար, կանոնավոր հերթականությամբ, ճշգրտված ժամերին:

«Էլեկտրամատակարարման ընթացքն աստիճանաբար պետք է բարելավվի»,- ասել է նա:

Երեկ` օրվա առաջին ժամերին, Հալեպի բոլոր շրջանները կայուն էլեկտրականություն են ունեցել, որից քաղաքը վերջին 6 տարվա ընթացքում զրկված էր: