Ռուսաստանը դադարեցրել է Սիրիայի վերաբերյալ ԱՄՆ-ի հետ կնքած հուշագրի գործողությունը

ԱՄՆ-ի կողմից Սիրիայի կառավարական ուժերի ռազմաբազայի վրա իրականացված ավիահարվածից հետո Մոսկվան դադարեցրել է Վաշինգտոնի հետ կնքած Սիրիայում իրականացվող գործողությունների շրջանակում ավիացիայի թռիչքների անվտանգության ապահովման ու միջադեպերի կանխման վերաբերյալ հուշագրի գործողությունը: Այդ մասին ասվում է ՌԴ ԱԳՆ-ի հայտարարությունում. հայտնում է Россия Сегодня-ն:

ԱՄՆ-ն երեկ թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային:

ԱՄՆ նախագահ Դոնալդ Թրամփը հայտարարել է, որ դա բխում էր ԱՄՆ ազգային անվտանգության կենսական շահերից: Հարվածի թիրախը Շայրաթ ռազմաբազան էր, որտեղից, ամերիկյան իշխանությունների կարծիքով, իրականացվել են քիմիական հարձակումները:

Նշենք, որ ՌԴ նախագահ Վլադիմիր Պուտինն արդեն արձագանքել է կատարվածին` ԱՄՆ-ի քայլերը սուվերեն պետության դեմ ագրեսիա որակելով: