Պայթյունից վիրավորված 3 զինծառայողներից մեկի վիճակը ծայրահեղ ծանր է

Տեղեկացրել էինք, որ փետրվարի 28-ին՝ ժամը 13:45-ի սահմաններում, ՀՀ ՊՆ N զորամասի պաշտպանության շրջանի մարտական դիրքում ինժեներական աշխատանքներ կատարելիս տեղի է ունեցել պայթուցիկ սարքի պայթյուն, ինչի հետևանքով ինժեներական աշխատանքներ կատարող պարտադիր ժամկետային զինծառայողներ, շարքայիններ Նարեկ Գևորգի Գրիգորյանը, Պերճ Արմենի Գաբրիելյանը և Էրիկ Սամվելի Սահակյանն ստացել են տարբեր աստիճանի բեկորային մարմնական վնասվածքներ:

Երեք զինծառայողներն էլ տեղափոխվել էին Երևանի կենտրոնական զինվորական հոսպիտալ:

Yerkir.am-ին հոսպիտալից հայտնեցին, որ զինծառայողներից երկուսին` Պերճ Գաբրիելյանին և Էրիկ Սահակյանին, տեղափոխել են այլ հիվանդանոց` նեղ մասնագիտական բուժման համար: Երկու զինծառայողների վիճակն էլ բավարար է: Իսկ Նարեկ Գրիգորյանը, ով բազմաբեկորային վնասվածքներ է ստացել, գտնվում է հոսպիտալում, և նրա առողջական վիճակը, ըստ բժիշկների, ծայրահեղ ծանր է: