Դավիթ Հարությունյանը խոստովանեց՝ ՀՀ դատական համակարգը շատ է սխալ վճիռներ կայացնում

Կառավարության այսօրվա նիստում կառավարության աշխատակազմի ղեկավար-նախարար Դավիթ Հարությունյանը ներկայացրեց վիճակագրական տվյալներ, թե վերջին տարիներին Հայաստանը որքան գումար է վճարել Մարդու իրավունքների դատարանում Հայաստանի դեմ դատական ատյանների կայացրած վճիռների պատճառով:

Եվ այսպես` 2014 թվականին Հայաստանի դեմ կայացվել է չորս վճիռ, որոնց  դիմաց վճարվել է 166 հազար եվրո, 2015 թվականին՝ ութ վճիռ, վճարվել է 86 հազար եվրո: 2016 թվականին կայացվել է կրկին ութ վճիռ և վճարվել 83 հազար եվրո:

Վարչապետ Հովիկ Աբրահամյանը հարցրեց, թե ինչի՞ հետևանք են Մարդու իրավունքների եվրոպական դատարանում ընդդեմ Հայաստանի կայացված վճիռները:

«Պատճառները, կարծում եմ, պարզ են, դա մեր դատական համակարգում առկա սխալներն են: Իհարկե, բոլոր երկրների դատական համակարգերում էլ լինում են սխալներ, բայց երբ երկրում սպառվում են սխալը շտկելու միջոցները, մարդիկ դիմում են ՄԻԵԴ»,- պատասխանեց Դավիթ Հարությունյանը: