Էրդողանի թիկնապահների և ամերիկացի գործակալների միջև հերթական հրմշտոցն է տեղի ունեցել

Լեգենդար բռնցքամարտիկ Մոհամմեդ Ալիի հուղարկավորությանը մասնակցելու համար ԱՄՆ-ում գտնվող Թուրքիայի նախագահ Ռեջեփ Թայիփ Էրդողանի թիկնապահների մասնակցությամբ հերթական հրմշտոցն է տեղի ունեցել:

Ըստ տեղեկությունների՝ Էրդողանը հյուրանոցից դուրս է եկել և նստել մեքենան: ԱՄՆ-ում Էրդողանի անվտանգությունն ապահովող ամերիկացի գործակալը մեքենայի դուռը փակելուց հետո, ըստ կարգի, կանգնել է դռան կողքին: Էրդողանի թիկնապահներից մեկը մոտեցել է գործակալին՝ ցանկանալով կանգնել նույն տեղում, ինչից հետո էլ հրմշտոց է եղել:  Մյուս թիկնապահների միջամտությամբ միջադեպը հարթվել է:

Հիշեցնենք, որ Ալիի ընտանիքը չեղարկել էր Էրդողանի ելույթը բռնցքամարտիկի հուղարկավորության ժամանակ՝ նշելով, որ նման որոշում է կայացվել, քանի որ ելույթ ունեցողների թիվն ավելացել է:

Ի դեպ, սա առաջին դեպքը չէ, որ Էրդողանի թիկնապահների մասնակցությամբ միջադեպ է տեղի ունենում: Էրդողանի՝ ԱՄՆ նախորդ այցի ընթացքում նրա թիկնապահները հայհոյել և քաշքշել էին լրագրողների՝ կանխելով նրանց մուտքը դահլիճ: