Էրդողանի պատիվն իմ պատիվն է. Դավութօղլուի սիրո խոստովանությունը

Թուրքիայի վարչապետ Ահմեդ Դավութօղլուն պաշտոնից հեռանալու վերաբերյալ իր ելույթում խոսել է նախագահ Ռեջեփ Թայիփ Էրդողանի հետ իր հարաբերությունների մասին:

«Նախագահի հետ եղբայրական անձնական հարաբերություններ ունեմ: Ես այս եղբայրությունն ամեն ինչից վեր եմ դասել: Վարչապետի գլխավոր խորհրդականի պաշտոնում էլ, ԱԳ նախարարի պաշտոնում էլ ես այս հարաբերությունը առաջնահերթություն եմ համարել: Մինչև վերջին շունչս շարունակելու եմ նրա հետ իմ հավատարիմ հարաբերությունները: Ոչ ոք ինձնից նրա հասցեին ուղղված վատ խոսք երբևէ չի լսելու: Նրա պատիվն իմ պատիվն է, նրա ընտանիքը` իմ ընտանիքը»,- հայտարարել է նա:

Դավութօղլուն քիչ առաջ հայտարարել է, որ «Արդարություն և զարգացում» կուսակցության արտահերթ համագումարին կուսակցության ղեկավարի պաշտոնում իր թեկնածությունը չի առաջադրելու, ըստ այդմ՝  հեռանալու է նաև վարչապետի պաշտոնից։

Ավելի վաղ հաղորդվել էր Թուրքիայի վարչապետ Դավութօղլուի և նախագահ Ռեջեփ Թայիփ Էրդողանի միջև առկա հակասությունների մասին։

Ռեջեփ Թայիփ Էրդողանն արդեն անդրադարձել է պաշտոնից Դավութօղլուի հեռանալուն՝ նշելով, որ դա նրա որոշումն էր։ «Պարոն Ահմեդ Դավութօղլուի անձնական որոշումն էր, բարին լինի»,- ասել է նա։