Թուրքիայի հայ պատգամավորները մասնակցել են Հայոց ցեղասպանության զոհերի հիշատակին մատուցված պատարագին

Թուրքիայի խորհրդարանի հայ պատգամավորներ Կարո Փայլանը, Սելինա Դողանն ու Մարգար Եսայանը մասնակցել են հայոց պատրիարքարայում Հայոց ցեղասպանության անմեղ զոհերի հիշատակին մատուցված պատարագին:

Հայ պատգամավորների հետ պատարագին ներկա է գտնվել նաև Թուրքիայում հիմնադրամների միության տնօրեն և ազգային փոքրամասնությունների հիմնադրամների ներկայացուցիչ Թորոս Ասլանը:

Սելինա Դողանը պատարագի ընթացքից մի քանի լուսանկար է տեղադրել` նշելով, որ Պոլսո հայոց պատրիարքի փոխանորդ Արամ Աթեշյանը նախ ընթերցել է նախագահ Էրդողանի ուղերձը, ապա մատուցել պատարագը:

Էրդողանի` «վառ ենք պահելու  օսմանյան հայերի հիշողությունները» արտահայտությունը հիշեցնելով` Սելինա Դողանը մաղթել է, որ Էրդողանի խոսքերը միայն ցանկություն չմնան:

«Այլևս «1915»-ներ թող տեղի չունենան: Թող ընդունվեն մեր բոլոր աղոթքները»,- ֆեյսբուքյան իր էջում նշել է Դողանը: