Ամուսնու կողմից արձակված կրակոցներից տուժած կնոջ մոտ դրական տեղաշարժ է նկատվում

Երեկ ծննդատանը ամուսնու կողմից արձակված կրակոցներից տուժած` 27-ամյա Մելինե Ասատրյանի մոտ դրական տեղաշարժ է նկատվում: Այս մասին yerkir.am-ին հայտնեց «Արմենիա» բժշկական կենտրոնի բուժօգնության գծով տնօրեն Արսեն Գրիգորյանը: Նրա խոսքով՝ կինը ներուղեղային վիրահատությունից հետո գիտակցության է եկել, հետվիրահատական նորմալ վիճակում է:

Հիշեցնենք, որ երեք ժամ տևած վիրահատության ընթացքում կատարվել էր հրազենային գանգուղեղային վնասվածքի առաջնային վիրաբուժական մշակում։ Պարզվել էր, որ կնոջ մոտ առկա է ծոծրակոսկրի բեկորային ներհրված կոտրվածք, միջաձիգ սինուսի վնասվածք, ուղեղիկի ձախ կիսագնդի ներուղեղային արյունակույտ և կոնտուզիոզ օջախ։ Արյունահոսությունը դադարեցվել է, հեմատոման` հեռացվել:

Բժշկի խոսքով` սակայն, հաշվի առնելով վնասվածների բարդությունը, ամեն րոպե կնոջ մոտ հնարավոր են բարդություններ: