Բռնցքամարտի Հայաստանի հավաքականի գլխավոր մարզիչը հրաժարվել է մեկնել Բաքու

Արդեն հայտնել ենք, որ  այսօր տեղի է ունեցել  Հայաստանի  բռնցքամարտի ֆեդերացիայի հերթական համաժողովը, որից հետո Հայաստանի Բռնցքամարտի ֆեդերացիայի նախագահ Արթուր Գևորգյանը հանդիպել է լրագրողների հետ:

«Բաքվում անցկացնելիք մրցաշարում մեր թիմը կղեկավարի երիտասարդների ավագ մարզիչ Կարեն Աղամալյանը, քանի որ հավաքականի գլխավոր մարզիչ Դավիթ Թորոսյանը հրաժարվել է մեկնել Բաքու: Նա մաքսիմալ կօգնի թիմին, բայց չի մեկնի մրցավայր: Երիտասարդների թիմի մարզիչը Բաքվում մրցաշարի մասնակցելու փորձ ունի: Ես ինքս եմ նրան առաջարկել, և նա համաձայնել է»,- ասաց նա:

Արթուր Գևորգյանը նաև նշեց, որ 2017 թվականի աշխարհի առաջնությունը հնարավոր է անցկացվի Հայաստանում: «Մենք AIBA-ից ունենք առաջարկ, որ 2017 թվականի աշխարհի առաջնությունն անցկացվի Հայաստանում, ինչի համար պետք է պայմաններ ստեղծենք: Մենք երիտասարդական առաջնություն անցկացնելու փորձ արդեն ունենք: Շատ ցանկալի է, որ մեծահասակների առաջնությունը նույնպես անցկացնենք Երևանում»,- ասաց նա: