Հակառակորդի գնդակից վիրավորված 84-ամյա պապի վիճակը միջին կայուն է

Տեղեկացրել էինք, որ փետրվարի 4-ին` կեսօրից հետո, ադրբեջանցի դիպուկահարի գնդակից ձախ ոտքի ծնկահոդի շրջանում հրազենային վերք էր ստացել Տավուշի մարզի Մովսես գյուղի բնակիչ` 84-ամյա Լևոն Անդրեասյանը: Ծերունուն նախ տեղափոխել էին Բերդի զինվորական հոսպիտալ և մշակել վերքերը, հետո` տեղափոխել Երևան:

Yerkir.am-ին Կենտրոնական կլինիկական զինվորական հոսպիտալի բուժծառայության պետ Արտաշես Խաչատրյանը հայտնեց, որ հոսպիտալում պապը վիրահատվել է:

«Վնասված էին ծունկն ու ազդրը: Նա բազմաբեկորային կոտրվածք էր ստացել: Կարելի է ասել` ամբողջովին հավաքել ենք ծունկը: Վիրահատությունը լավ է անցել, հետվիրահատական շրջանը նույնպես նորմալ է անցնում: Միակ խնդիրը` տարիքն է, չես կարող ասել, թե տվյալ տարիքի մարդկանց մոտ ինչ կերպ կարող է հետվիրահատական շրջանն ընթանալ»,- ասաց Խաչատրյանը:

Նա տեղեկացրեց նաև, որ բժիշկները պապի առողջական վիճակը գնահատում են միջին ծանր: