Նախկին բարձրաստիճան պաշտոնյային 12 տարվա ազատազրկման դատապարտող դատավճիռը կբողոքարկվի

Արդեն տեղեկացրել ենք, որ արդարադատության նախարարության քրեակատարողական վարչության նախկին պետ Սամվել Հովհաննիսյանը դատապարտյալ Ջամալ Սլոյանի սպանությունը նախապատրաստելու, նաև խարդախություն կատարելու համար դատապարտվեց 12 տարվա ազատազրկման:

Yerkir.am-ի հետ զրույցում Ս. Հովհաննիսյանի պաշտպան Վահագն Մարտիրոսյանը նշեց, որ իր համար անսպասելի էր նման դատավճիռը: Պաշտպանական ճառում փաստաբանը պահանջել էր արդարացնել իր պաշտպանյալին, քանի որ նրա մեղավորությունն ապացուցող որևէ հիմք չկա գործում:

«Միանշանակորեն բողոքարկելու եմ դատավճիռը: Դատարանի որոշմամբ` ապօրինի ձայնագրառումները հանվել էին ապացույցների շարքից, հետևաբար, դրանց վերաբերող մյուս ապացույցները նույնպես դատարանը չպետք է ընդուներ: Առայժմ ավելին ասել չեմ կարող, դեռևս դատական ակտին ամբողջությամբ ծանոթ չեմ»,- ասաց փաստաբանը: