Իսկ ի՞նչ է կարծում թունդ ալկոհոլային խմիչքների գովազդի մասին Դերենիկ Դումանյանը

ԱԺ նիստում կառավարության հետ հարցուպատասխանի ժամանակ ՀՅԴ խմբակցության քարտուղար Աղվան Վարդանյանը հարց ուղղեց կառավարությանը:

Նա նշեց, որ այսօր ԱԺ-ն ընդունեց թունդ ալկոհոլային խմիչքների գովազդը հեռուստատեսությամբ թույլատրելու մասին օրինագիծը, սակայն օրենքի պահանջն է՝ ունենալ կառավարության ներկայացրած օրենքի ազդեցության գնահատականը, և արդյո՞ք պատրաստվում է կառավարությունը հնգօրյա ժամկետում ԱԺ ուղարկել օրենքի ազդեցության գնահատականը՝ առողջապահական, սոցիալական, մրցակցության առումներով, ինչը նույնպես օրենքի պահանջ է: «Խնդրում եմ նաև ՀՀ առողջապահության նախարար Դերենիկ Դումանյանի դիրքորոշումը այս օրենքի վերաբերյալ»,- ասաց պատգամավորը:

Հարցին պատասխանելու համար ամբիոնին մոտեցավ կառավարության աշխատակազմի ղեկավար-նախարար Վաչե Գաբրիելյանը: Սակայն Աղվան Վարդանյանը նշեց, որ ինքը ցանկանում էր լսել Դերենիկ Դումանյանի դիրքորոշումը, նաև կսպասեն կառավարության գրավոր պատասխանին: