Կոստանյանը համակարգից առանձնանալու անհրաժեշտություն չի տեսնում

Գլխավոր դատախազի թեկնածու Գեւորգ Կոստանյանի հետ հանդիպումներից հետո ԱԺ խմբակցությունների ներկայացուցիչները պնդում էին, որ խնդիրների պատճառը ոչ այնքան Գեւորգ Կոստանյանի անձն է, որքան համակարգը, եւ հարկավոր է փոխել նախ համակարգը:

Լրագրողները Գեւորգ Կոստանյանից հետաքրքրվեցին, թե արդյո՞ք կարողանալու է համակարգից առանձին, անկախ գործել եւ կլինի՞ ավելի լավը, քան նախորդը: «Խնդիրն այն է, որ համակարգի մաս կամ համակարգից առանձին դիտվելու որեւէ անհրաժեշտություն երբեք չի եղել, որովհետեւ այդ համակարգն էլ անձանցից է կառուցված, եւ այդ համակարգի նկատմամբ վերաբերմունքը կոնկրետ անձանց գործողությունների արդյունքներով է պայմանավորված, եւ եթե մենք ունենք միասնական սկզբունքներ, գործելաոճ` մեր պարտականությունների կատարման առումով, սկզբունքները միասնական են թե' ինձ համար եւ թե' համակարգի բոլոր անդամների համար»,- հայտարարեց Կոստանյանը:

Դատախազական համակարգի թերությունների մասին խոսել նա չցանկացավ, նպատակահարմար էր գտնում խոսել ապագայի հետ կապված հարցերի մասին: