Կիպրոսի ազգային բանկի բանկոմատներն արգելափակվել են

Կիպրոսում ֆինանսական ճգնաժամը նոր թափ է հավաքում: Երկրի ֆոնդային բորսան այսօր հայտարարել է, որ չի բացվի մոտակա 2 օրերին: Բորսայի ղեկավարությունը պարզաբանել է, որ այդ քայլը պայմանավորված է Կենտրոնական բանկի` «կապիտալի փախուստը» կանխելու նպատակով բանկային արձակուրդը երկարագձելու որոշմամբ:

Առավոտից երկրի մեծությամբ երկրորդ` Կիպրոսի ազգային բանկի բաժանմունքների մոտ մարդիկ են հավաքել, որոնք ցանկանում են բանկոմատների միջոցով գումար ստանալ, սակայն դրանք արգելափակված են: Այդ բանկն ամենաշատն է տուժել Հունաստանի պարտքային ճգնաժամի պատճառով եւ հավանորեն կփակվի:

Երեկ երեկոյան Կիպրոսի կառավարությունը հակաճգնաժամային այլընտրանքային փաթեթ է պատրաստել, որը ներկայումս քննարկվում է երկրի նախագահի հետ: 

Այսօր կիպրոսյան «Սիգմա» հեռուստաալիքը ներկայացրել է հարցման արդյունքներ, ըստ որոնց` երկրի բնակչության 91 տոկոսը դեմ է բանկային դեպոզիտների հարկմանը, իսկ 63 տոկոսը պահանջում է, որ Կիպրոսը դուրս գա եվրոյի գոտուց: