Անհայտ մի խումբ սպառնում է Կիպրոսի եւ Կենտրոնական բանկի նախագահներին

Կիպրոսի նախագահ Նիկոս Անաստասիադիսը եւ երկրի Կենտրոնական բանկի ղեկավար Պանիկոս Դիմիտրիդիսը սպառնալիքներ են ստանում այն որոշման կայացումից հետո, ըստ որի` 100 հազար եվրոյից ավելի բանկային ավանդները հարկվելու են: Այդ մասին, ըստ ИТАР-ТАСС-ի, այսօր հայտարարել է կիպրական «Սիգմա» հեռուստաընկերությունը:

Այսպես կոչված` «դեպոզիտների փրկության խումբը, որը երդվել է մինչեւ մահ պայքարել դրա համար», հայտարարություն է տարածել, որում ակնհայտ սպառնալիքներ են պարունակվում երկրի եւ կենտրոնական բանկի նախագահների, նրանց ընտանիքների անդամների հասցեին:

«Մենք  ձեզ զգուշացնում ենք, բլեֆ չենք անում: Կսկսենք ձեր թոռներից, հետո կանցնենք ձեր զավակներին, իսկ ձեզ կթողնենք վերջում, որ նույնքան ցավ զգաց, որքան մենք: Մենք չենք պատկանում որեւէ կուսակցության կամ կազմակերպության, սակայն երդվում ենք, որ դուք կմեռնեք»,- ասվում է թռուցիկում եւ կոչ արվում «դադարեցնել դեպոզիտների խուզումը»: