Չեխիան աջակցում է Թուրքիայի եվրոպական նկրտումներին

Պաշտոնական Պրահան աջակցում է Թուրքիայի` ԵՄ լիիրավ անդամ դառնալու ձգտումներին. հայտարարել է Չեխիայի վարչապետ Պյոտր Նեչասը Թուրքիայի վարչապետ Ռեջեփ Թայիփ Էրդողանի հետ Պրահայում անցկացված բանակցություններից հետո. տեղեկացնում է РИА Новости-ն:

«Մենք կշարունակենք մնալ այն դիրքորոշմանը, որ Թուրքիան անդամակցության համար անհրաժեշտ բոլոր չափանիշների բավարարումից հետո կարող է դառնալ ԵՄ լիիրավ անդամ»,- նշել է Նեչասը:

Իր հերթին, Էրդողանը հայտարարել է, որ Թուրքիան արդեն մի քանի տասնամյակ է` կանգնած է «Եվրամիության դարպասների մոտ», եւ Թուրքիայի անդամակցությանը խոչընդոտելը «անթույլատրելի է»: Նա հիշեցրել է, որ թեեւ Թուրքիան ձեւականորեն ԵՄ անդամ չէ, սակայն սերտորեն կապված է Եվրոպային: «ԵՄ տարածքում ներկայումս 5 միլիոն թուրք է բնակվում: Ուրեմն եկեք ավարտենք ինտեգրման գործընթացը»,- ասել է նա:

Նեչասը եւ Էրդողանը քննարկել են փոխադարձ ներդրումներին, էներգետիկայի ոլորտում համագործակցությանը վերաբերող հարցեր: