Դինքի սպանության համար պատասխանատուներից մեկի պաշտոնն աստիճանաբար բարձրացվում է

Թուրքական կառավարությունում կադրային փոփոխություններ են տեղի ունեցել: Մշակույթի, առողջապահության, կրթության եւ ներքին գործերի նախարարներն ազատվել են իրենց զբաղեցրած պաշտոններից:

«Հյուրիեթ» պարբերականի հաղորդմամբ` վարչապետ Ռեջեփ Թայիփ Էրդողանի հրամանագրով` ՆԳ նախարարի պաշտոնը ստանձնել է Մուամեր Գյուլերը: Նրա անունը Հրանտ Դինքի ընտանիքի փաստաբանները ներառել էին այն պաշտոնյաների ցուցակում, ովքեր պետք է պատասխանատվություն կրեին հայազգի լրագրողի սպանության համար, սական այդպես էլ չկրեցին: Դինքի սպանության համար նրան պատասխանատու ճանաչել էին նույնիսկ երկրի ընդդիմադիրները:

«Ակօսի» նախկին խմբագրի սպանության ժամանակ Գյուլերը Ստամբուլի նահանգապետն էր։ Դինքի սպանությունից հետո ստանձնեց Թուրքիայի հասարակական կարգապահության եւ անվտանգության վարչության պետի պաշտոնը, այնուհետեւ իշխող կուսակցության ցուցակով դարձավ պատգամավոր, այսօր արդեն նախարար է: