Ադրբեջանը դժգոհ է Իվանիշվիլիի հայտարարությունից

Ադրբեջանը անհանգստացած է Վրաստանի վարչապետ Բիձինա Իվանիշվիլիի` Կարս-Ախալքալաք երկաթուղու կառուցման աննպատակահարմարության վերաբերյալ հայտարարության վերաբերյալ:

Trend գործակալությանը Ադրբեջանի տրանսպորտի նախարարության մամուլի քարտուղար Նամըգ Հասանով հայտնել է, որ Բաքու-Թբիլիսի-Կարս երկաթուղային նախագիծը տարածաշրջանային եւ համաշխարհային մասշտաբի ծրագիր է, որի իրավական հիմքը Վրաստանի, Ադրբեջանի եւ Թուրքիայի կառավարությունների եռակողմ համաձայնագիրն է: Ըստ այդ համաձայնության` Ադրբեջանի կառավարությունը վրացական կողմին 755 մլն դոլարի արտոնյալ վարկ է տրամադրել` ճանապարհի վրացական հատվածի կառուցման համար:

«Ադրբեջանը համոզված է, որ այդ նախագիծը հսկայական ռազմավարական եւ տնտեսական նշանակություն կունենա տարածաշրջանում եւ դրանից դուրս: Հարկ է նշել, որ իրականացումից հետո նախագիծը կդառնա տարածաշրջանային անվտանգության մասը: Ադրբեջանը մշտապես կատարել է միջազգային համաձայնագրերի շրջանակներում ստանձնած պարտավորությունները եւ նույնը սպասում է նաեւ իր գործընկերներից»,- ասել է Հասանովը: