"Ուրիշ" աչքով կնայեն վարակիչ հիվանդություններին

ՀՀ նախագահ Սերժ Սարգսյանը պետական այցով մեկնել է Ռուսաստան: Նախագահի գլխավորած պատվիրակության կազմում է նաև առողջապահության նախարար Հարություն Քուշկյանը:

Պաշտոնական այցի երկրորդ օրը, ի թիվս այլ փաստաթղթերի, կնքվել է նաև հուշագիր առողջապահության ոլորտում. Քուշկյանը և ՌԴ Մարդու բարեկեցության և սպառողների իրավունքների պաշտպանության ոլորտում դաշնային վերահսկողության ծառայության ղեկավար Գենադի Օնիշչենկոն ստորագրել են «Վարակիչ հիվանդությունների դեմ պայքարի համագործակցության» հուշագիր:

Հայտնի է, որ վարակիչ հիվանդությունները սպառնալիք են երկրագնդի բնակչության առողջության համար: Այսուհետ ՀՀ և ՌԴ տարածքներում վարակիչ հիվանդությունների մասին օպերատիվ տեղեկատվության փոխանակումը կիրականացվի նոր հուշագրի կետերին համապատասխան:

Վարակիչ հիվանդությունների տարածումը կանխելու և առհասարակ կանխարգելիչ միջոցառումներ իրականացնելու նպատակով կստեղծվի մշտադիտարկման նոր, առավել կատարելագործված համակարգ: Գիտահետազոտական աշխատանքների հիման վրա կմշակվեն և կներդրվեն ախտորոշիչ և կանխարգելիչ նոր մեթոդներ: Առանձնահատուկ ուշադրություն է դարձվելու լաբորատորիաների նյութատեխնիկական բազայի հզորացմանը և համապատասխան մասնագետների վերապատրաստմանը:

Ըստ հուշագրի` ապահովվելու է նաև ոլորտում միջազգային համագործակցության զարգացման շարունակականությունը: