Խամենեին ընդդեմ Ահմադինեժադի

Իրանի հոգեւոր գերագույն առաջնորդ այաթալլա Խամենեին կարծիք է հայտնել, որ ապագայում իսլամական հանրապետության նախագահի պաշտոնի կարիք կարող է չլինել. տեղեկացնում է mignews.com-ը:

Վերլուծաբանների կարծիքով` դա եւս մեկ նախազգուշացում է նախագահ Մահմուդ Ահմադինեժադին, որի գործունեությունից այաթոլլան դժգոհ է:

«Ներկա պահին մեր երկրում գործում է նախագահական ուղիղ ընտրությունների համակարգը, որի ժամանակ ժողովուրդն ընտրում է գործադիր իշխանության ղեկավարին: Ապագայում` հեռավոր կամ ոչ այնքան, համակարգը կարող է փոխվել խորհրդարանական հանրապետության` որպես մեր պետության կարիքներին ավելի համապատասխանող»,- ասել է այաթոլլան:

Խամենեիի եւ Ահմադինեժադի տարաձայնությունները սկսվել են այս տարվա ապրիլից, երբ նախագահը ցանկանում էր պաշտոնանկ անել հետախուզության նախարարին, իսկ այաթոլլան վետո դրեց այդ որոշման վրա: