Սթրոս-Կանը նախագահի թեկնածու չի առաջադրվի

Արժույթի միջազգային հիմնադրամի նախկին ղեկավար Դոմինիկ Սթրոս-Կանն իր թեկնածությունը չի առաջադրելու Ֆրանսիայի` 2012 թվականին կայանալիք նախագահական ընտրություններին, թեեւ նախկինում ցանկանում էր:

«Այո, ես կցանկանայի թեկնածու լինել: Ես կարծում էի, որ ԱՄՀ-ում իմ դիրքն ինձ նոր հնարավորություններ էր տվել` գնահատելու Ֆրանսիայի դժվարություններն ու առավելությունները գլոբալացման համատեքստում: Բայց այդ ամենն անցյալում է, ես միանշանակորեն այլեւս թեկնածու չեմ: Թեեւ կարծում եմ, որ մեր երկրում ձախերի հաղթանակն անխուսափելի է»,- ըստ France Presse-ի` ասել է նա:

Դեռեւս այս տարվա գարնանը Սթրոս-Կանը Ֆրանսիայի նախագահ դառնալու բոլոր նախադրյալներն ուներ: Սակայն բռնաբարության մեղադրանքով ձերբակալությունից հետո նրա վարկանիշն ընկավ: Տարբեր հարցումները ցույց են տալիս, որ ֆրանսիացիների մեծ մասը չի ցանկանում նրան երկրի նախագահի պաշտոնում տեսնել: