Սանձարձակ բարքեր` աղանդավորական կոմունայում

Բոլիվիայում բողոքական աղանդի 7 անդամներ դատապարտվել են 25 տարի ազատազրկման` յուրաքանչյուրը, մոտ 100 կանանց բռնաբարության համար: Աղանդի 8 անդամներ էլ դատապարտվել են 12,5 տարվա ազատազրկման թմրանյութերի տարածման համար, որոնց միջոցով տղամարդիկ անգիտակից վիճակի մեջ են գցել կանանց, որից հետո բռնաբարել դժբախտներին:

Նման բարքեր են տիրում ագրարաային կոմունայում. գրում է El Dia թերթը: Ըստ դատավորի` բռնաբարվածները ե'ւ հասուն կանայք են, ե'ւ երեխաներ, ե'ւ ծերեր:

Մենոնիտների աղանդին պատկանող դատապարտյալները 18-45 տարեկան են: Նրանց հաջողվել է հայտնաբերել այն բանից հետո, երբ զոհերից մեկն այդ սանձարձակությունների ժամանակ ուշքի է եկել:

Մենոնիտները մերժում են հարստությունը եւ իշխանությունը: Նրանք ապրում են մեկուսացված համայնքներով: 19-րդ դարում Եվրոպայում կրոնական հետապնդումներից փախչելով` նրանք բնակություն են հաստատում նախ ԱՄՆ-ում, ապա մասամբ տեղափոխվում Հարավային Ամերիկա, որտեղ ներկայումս նրանց թիվը հասնում է 40 հազարի: